काठमाडौं । नेकपा एमालेले आज निर्वाचन घोषणापत्र सार्वजनिक गर्ने भएको छ । मंसिर ४ मा हुने प्रतिनिधिसभा र प्रदेशसभा सदस्य निर्वाचनका लागि मंगलबार एमालेले घोषणापत्र सार्वजनिक गर्न लागेको हो । आज (मंगलबार) दिउँसो साढे १ बजे होटल याकएण्ड यतिबाट घोषणा पत्र सार्वजनिक गर्न लागिएको एमाले प्रचार विभाग उपप्रमुख विष्णु रिजालले जानकारी दिए । त्यसक्रममा उनले घोषणापत्रका बारेमा अध्यक्ष केपी ओलीसँग प्रत्यक्ष संवादको व्यवस्था समेत मिलाइएको बताए । आम निर्वाचन नजिकिएसँगै निर्वाचनमा सहभागी दलहरु आ-आफ्नो उम्मेदवारका लागि मत माग्न आगामी पाँच वर्षमा पार्टीले लिएको लक्ष्य र संकल्पस्वरुप घोषणापत्र सार्वजनिक गरिरहेको छ । यसअघि शनिबार नेपाली कांग्रेसले र सोमबार माओवादी केन्द्र, एकीकृत समाजवादी, राप्रपासहित दलले घोषणापत्र सार्वजनिक गरिसकेका छन् ।