काठमाडौं । बाजुरामा ट्याक्टर दुर्घटना हुंदा चार जनाको मृत्यु भएको छ । आइतबार साँझ बढीमालिका नगरपालिका–२ मार्तडी गौमुलमा दुईवटा ट्याक्टर एकआपसमा ओभरट्याक गर्ने क्रममा दुर्घटनामा परेको प्रहरीले जनाएको छ ।
जिल्ला प्रहरी कार्यालय बाजुरामा प्रहरी प्रमुख प्रहरी नायब उपरीक्षक कविन्द्र बोहराका अनुसार एउटा ट्याक्टरले अर्को ट्याक्टरलाई ओभरटेक गर्नेक्रममा एउटा खोलामा खसेको छ भने अर्को भित्तामा ठोक्किएर दुर्घटनाग्रस्त भएको छ ।
सु.प्र.प. ०१०० २ त ४१०५ नम्बरको ट्याक्टर खोलामा खसेको छ । उक्त ट्याक्टरमा सवार चार जनाको मृत्यु भएको प्रहरीले जनाएको छ । मृत्यु हुनेमा तीनजना पुरुष र एक महिला रहेका छन् । हाल मृतकको नाम खुलेको छैन ।
यस्तै अर्को लु ३ त ७३०५ नम्बरको ट्याक्टर दुर्घटना भएर भित्तामा बजारिएको छ। सो ट्याक्टर दुर्घटनामा के कति क्षति भयो भन्नेबारेमा जानकारी प्राप्त हुन बाँकी भएको र हाल प्रहरी टोली घटनास्थलमा खटिएको छ ।