नेपालगन्ज : लामो समयदेखि पत्रकारितामा सक्रिय पत्रकार कृष्णराज अधिकारी सम्मानित भएका छन्। शनिबार नेपालगन्जको सिटी प्यालेसमा सम्पन्न 'नेपालगन्ज उद्योग वाणिज्य संगको ३२ र ३३ औं वार्षिक साधारणसभाको अवसरमा पत्रकार अधिकारी सम्मानित भएका हुन्।

नेपालगन्जमा रहेर पत्रकारिताको माध्यमबाट बाँकेको आर्थिक, सामाजिक एवम् पर्यटकीय क्षेत्रमा उच्च योगदान पुर्‍याएको भन्दै नेपालगन्ज उद्योग वाणिज्य संघले उनलाई माला, सम्मान पत्र र दोसल्लासहित सम्मान गरेको हो।

सम्मानले आफूलाई झन् पत्रकारितामा दृढ भई निष्पक्ष तवरले अघि बढ्ने हौसला मिलेको उनले बताए। पछिल्लो समय उनले समाजमा रहेका बेथिति र विसंगतिको बारेमा कलम चलाउँदै आएका छन्। निकै सक्रिय रुपमा पत्रकारिता गरिरहेका उनी कुशल कलाकारसमेत हुन्।

उनले केही फिल्ममा अभिनय गर्नुका साथै ५० बढी म्युजिक भिडियोमा समेत काम गरिसकेका छन्। नेपालगन्जमै रहेर उनले पछिल्लो समय समग्र कला क्षेत्रको बारेमा पनि कलम चलाउँदै आएका छन्।