बारा । बारा प्रहरीले खाली ट्यांङकरमा लुकाएर भारत तर्फ लैजाने तयारी गरेको २ सय १८ किलो अवैध लागू ओैषध गाँजा सहित २ जनालाई पक्राउ गरेको छ ।प्रहरी चौकी पथलैया बाराबाट खटिएको प्रहरी टोलीले जितपुर सिमरा उपमहानगरपालिका १ पथलैया चोक स्थित महमद आलम साहको रामरहिम ग्यारेजमा महोत्तरी बर्दिवास नगरपालिका वडा नम्बर ८ बस्ने ३३ वर्षको चालक घनश्याम गिरी र सह-चालक चितवन खैरहनी नगरपालिका २ बस्ने राजकुमार दवाडिलाई उक्त परिणामकाे गाँजा सहित पक्राउ गरेको हाे । काठमाण्डौबाट भारतको बरौलीमा तेल लिन जाँदै गरेको ना ४ ख २९७९ न. को खाली ट्यांङकरमा लुकाई छिपाई गाँजा लगिरहेको भन्ने गोप्य सूचनाकाे आधारमा चेकजाँच गर्ने क्रममा उक्त ट्याङकरको च्याम्बर भित्र लुकाई छिपाई रातो प्लाष्टिकमा पोका बनाई राखेको २१८ किलो ग्राम (१९ पोका) अबैध लागु औषध गाजाँ बरामद गरिएको प्रहरीले जनाएको छ । निजहरुलाई नियन्त्रणमा लिई अनुसन्धान भइरहेको जिल्ला प्रहरी कार्यालय बाराका प्रहरी नायब उपरीक्षक गौतम मिश्राले जानकारी दिनुभयो ।