रौतहट ।
नेपाली कांग्रेस रौतहटको सभापतीमा सुनिल यादव विजयी भएका छन् । पार्टीको १४औं जिल्ला अधिवेशनमा संस्थापन पक्षबाट यादव सभापतिमा विजयी भएका हुन् ।
यादवले जिल्ला सभापतिमा १ हजार ३ सय ६२ मत प्राप्त गर्दा संस्थापनइतरका हृदयनारायण यादवले एक हजार ६४ मत प्राप्त गरे । कांग्रेस रौतहटको सचिव पदमा रामचन्द्र गिरी बाहेक बाँकी सम्पूर्ण पदाधिकारीमा संस्थापन पक्षका उम्मेदवार नै विजयी भएका छन् ।
उपसभापति पदमा संस्थापन पक्षका रामलोचनप्रसाद कललार र धीरेन्द्रप्रसाद सिंह निर्वाचित भएको नेपाली कांग्रेस जिल्ला निर्वाचन अधिकृत दीपकराज रेग्मीले दिएको जानकारी दिए ।
पार्टीको दुई सचिवमध्ये एकमा संस्थापन पक्षका राजेश कुमार चौधरी विजयी भएका छन् भने अर्कोमा संस्थापनइत्तरका गिरी विजयी भएको अधिकृत रेग्मीले बताए । दुई सहसचिवमा संस्थापन पक्षकै मोहम्मद फिरोज आलम र सिकेन्द्र पटेल विजयी भएका छन् ।
