काठमाडौं । नेपाल प्रहरीको डिआइजी बढुवा विवादमा परेको छ । बढुवामा अन्याय भएको भन्दै दुई एसएसपीले उजुरी सुन्ने समितिमा उजुरी दिएका छन् ।
चक्रबहादुर सिंह र अनुराग द्वीवेदीले उजुरी दिएका हुन् । मंगलबारसम्म उजुरी दिने समय थियो । उजुरी उपर बुधबारभित्र टुंगो नलागे सिफारिस भएका विकासराज खनालले बिहीबारदेखि अवकाश पाउनेछन् । जसकारण उजुरीको बुधबार नै किनारा लगाउन आइजिपी बसन्तबहादुर कुँवर मंगलबार दिनभर गृह मन्त्रालयमा छलफलमा सक्रिय थिए ।
बढुवा समितिले कुबेर कडायत, केदार ढकाल, विष्णुकुमार केसी, भरतबहादुर बोहेरा, रबिन्द्र केसी, राजेशनाथ बाँस्तोला, चन्द्र कुबेर खापुङ, जनक भट्टराई, लालमणि आचार्य, सुरेन्द्र प्रसाद मैनाली, अर्जुन चन्द, यज्ञ बिनोद पोखरेल र विकासराज खनाललाई सिफारिस गरेको थियो । बढुवाप्रति एसएसपी सिंहले फेसबुकमै असन्तुष्टि जनाएका थिए । बढुवा नहुँदा उनले आगामी साता अवकाश पाउनेछन् ।