बारा । बाराको कलैयास्थित बाल एकता बोर्डिङ स्कुलका प्रिन्सिपल रूपेश स्वर्णकारको हत्याका मुख्य आरोपी सुटर सुजित सिंह पक्राउ परेका छन् । उनलाई मंगलबार राति दुवै खुट्टामा गोली हानेर नियन्त्रणमा लिएको हो ।
भारत मोतिहारी दर्पाथाना–१, सुक्लहियाका २५ वर्षीय सुटर सुजितकुमार सिंहलाई प्रहरीले नियन्त्रणमा लिएको जिल्ला प्रहरी बाराका प्रवक्ता दधिराम न्यौपानेले जानकारी दिए ।
उनका अनुसार गएराति बजेबाराको विश्रामपुर गाउँपालिका—३ मा फेला परेका सिंहलाई प्रहरीले पक्राउ गर्न खोज्दा भाग्न थालेपछि खुट्टामा गोली प्रहार गरेर नियन्त्रणमा लिइएको हो । सिंहको हाल जिल्लाको कलैया अस्पतालमा उपचार भइरहेको अस्पताल स्रोतले बताएको छ ।
उनको साथबाट प्रहरीले एक थान पेस्तोल र त्यसमा लाग्ने पाँच राउड गोली बरामद गरेको छ ।
प्रिन्सिपल स्वर्णकारको हत्या आरोपमा बाराको कलैयाका २ की राधा गुप्ता, जाबेर अख्तर, चन्दन यादव, रियाज अन्सारी र अभिनव कुमार सिंह थुनामा छन् ।