काठमाडौं । राष्ट्रिय क्रिकेट टोलीका पुरुष खेलाडीले प्रतिओडिआई खेल म्याच फि १० हजार र महिला खेलाडीले पाँच हजार पाउने रुपैयाँ भएका छन् । नेपाल क्रिकेट संघ (क्यान) ले आर्थिक कार्यविधि र नियमावली २०७७ मंगलबार पारित गर्दै उक्त निर्णय गरेको हो ।

मंगलबार क्यानको केन्द्रिय बोर्ड बैठकले आर्थिक समितिका क्यानका कोषाध्यक्ष रोशन सिंह, सदस्य दुर्गाराज पाठक र माधव कर्माचार्यले प्रस्तुत गरेको प्रस्तावित नियमावली पारित (अनुमोदन) भएको छ । ग्रास रुटबाट आउने खेलाडी देखि अम्पायर, अफिसल, क्यान पदाधिकारी, ग्राउन्ड स्टाफ, जिल्ला र प्रदेश सबैले पाउने अधिकार, भत्ता, सेवा सुविधालाई सुनिश्चिता गर्दै आर्थिक कार्यविधि र नियमावली २०७७ जारी गरेको कोषाध्यक्ष सिंहले जनाएका छन् । उनले दुई दशकपछि आर्थिक नियमावली पहिलो पटक जारी भएको दाबी पनि गरे । आर्थिक नियमावलीसँगै क्यानलाई दैनिक कार्यको लागि थप सहज हुने छ । के छ आर्थिक नियमावलीमा ? नयाँ आर्थिक नियमावली अन्तर्राष्ट्रिय ओडिआई खेलको म्याच फि पुरुष टोलीका खेलाडीले १० हजार र महिला खेलाडीले ५ हजार प्राप्त गर्ने छन् । टि२० अन्तर्राष्ट्रिय प्रतियोगिता पुरुष खेलाडीले ५ हजार र महिला खेलाडीले ३ हजार पाउने छन् । महिला र पुरुष दुवै टोलीका खेलाडीले अन्तर्राष्ट्रिय प्रतियोगिता बन्द प्रशिक्षणमा रहँदा दैनिक पाँच सय भत्ता पाउने छन् । जसमा यातयात सुविधा पनि उपलब्ध गराउने जनाएको छ । क्यानले महिला र पुरुष दुवै टोलीका खेलाडीलाई गतवर्ष अन्तर्राष्ट्रिय ओडीआई र टि ट्वान्टी आईको म्याच फि ५ हजार दिने निर्णय गरेको थियो ।

एकदिवसिय घरेलु प्रतियोगितामा पुरुष खेलाडीले दैनिक भत्ता २ हजार ५ सय र महिला खेलाडीले २ हजार प्राप्त गर्ने छन् । टि२० घरेलु प्रतियोगितामा पुरुष टोलीले दैनिक भत्ता २ हजार र महिला खेलाडीले १ हजार पाँच सय प्राप्त गर्ने छन् । बन्द सत्र म्याच फि पाँच सय हुने छ । उमेर समूहको राष्ट्रिय प्रतियोगिता म्याच फि एक हजार हुने छ । सबै म्याच फि खाना, बस्न र यातयात खर्च छोडेर हुने छ । भ्रमणमा जाने सबै पदाधिकारी, खेलाडीहरु, अफिसियल, मुख्य प्रशिक्षकको लागि विदेशमा १० लाख र स्वदेशमा पाँच लाख बराबर रकमको दुर्घटना बीमा गर्न लाग्ने खर्च क्यानले ब्योहोर्ने सक्ने जनाएको छ । तर सामाजिक सुरक्षा कोष अन्तर्गत बीमा सुविधा पाएको खण्डमा संघले सो खर्च व्यहोर्ने छैन । अन्तराष्ट्रिय प्रतियोगिताहरुमा सहभागी हुन जाने नेपालको राष्ट्रिय टिम तथा विभिन्न उमेर समूहको महिला, पुरुष टोलीका खेलाडी, अफिसियल, प्रशिक्षक, चिकिल्सक लगायतले दैनिक भत्ता ५० अमेरिकी डलर पाउने छन् । जुन खेल सुरुहुने दुई दिन अगाडि र खेल समाप्त भएको एक दिनपछि सम्म लागू हुने छ । कार्यालय सञ्चालनको लागि जिल्लाले वार्षिक एक लाख र प्रदेशले तीन लाख रुपैयाँ प्राप्त गर्ने छन् । हाम्रो खेलकुदबाट