काठमाण्डौं । नेपाललाई ३८ वर्षपछि दशरथ रंगशालामा फुटबलको अधिकारिक प्रतियोगितामा उपाधि जित्ने अवसर मिलेको छ । दशरथ रंगशालामा जारी महिला साफ च्याम्पियनसिपको छैटौं संस्करणको फाइनलमा सोमबार नेपालले बंगलादेशको सामना गर्दैछ । स्वदेशमा सन् १९८४ मा भएको तत्कालिन दक्षिण एसियाली महासंघिय खेलकुद (साफ) हालको दक्षिण एसियाली खेलकुद (साग) को पहिलो संस्करणमा नेपाली पुरुष टोलीले फुटबल उपाधि जितेको थियो । सिनियर टोलीले स्वदेशमा जितेको त्यो एकमात्र औपचारिक अन्तर्राष्ट्रिय फुटबल उपाधि हो । त्यसयता नेपाली सिनियर महिला वा पुरुष टोलीले स्वदेशमा उपाधि जितेको छैन । पुरुष फुटबलमा पहिलो अन्तर्राष्ट्रिय उपाधि जितेको ३८ वर्षपछि सोही दशरथ रंगशालामा महिला टोलीले पहिलो अन्तर्राष्ट्रिय उपाधि जित्ने अवसर पाएको छ । पछिल्लो पटक पुरुष टोलीले सन् २०१६ मा मलेसियामा भएको एएफसी सोलिडारिटी कप जितेको थियो । नेपालले जितेको त्यो नै अन्तिम फुटबल उपाधि हो । त्यसअर्थ ६ वर्षयता नेपाल अन्तर्राष्ट्रिय फुटबलमा उपाधिविहिन छ । यसबीचमा नेपालको पुरुष टोलीले साफ च्याम्पियनसिप तथा महिला टोलीले साफ र सागको फाइनल खेल्दा उपाधि जित्न सकेन । नेपाली टोली स्वदेशमा समग्रमा पाँचौं पटक अन्तर्राष्ट्रिय प्रतियोगिताको फाइनल खेल्ने तयारीमा छ । महिला टोलीले स्वदेशमा फाइनल खेल्न लागेको यो तेस्रो अवसर हो । यसअघि महिला टोलीले सन् २०१९ एकै वर्षमा नेपालले पाँचौं साफ च्याम्पियनसिप र १३ औं सागको फाइनल खेलेको थियो । साफ विराटनगर र साग पोखरामा भएको थियो । महिला टोलीले दशरथ रंगशालामा पहिलो पटक खेलको अन्तर्राष्ट्रिय प्रतियोगिता साफ च्याम्पियसिप हो । पुरुष टोलीले भने १९८४ पछि सन् १९९९ को आठौं सागमा दशरथ रंगशालामा फाइनल खेलेको थियो । त्यति बेला भने नेपाल फाइनलमा पराजित भएको थियो । स्वदेशमा सिनियर टोली उपाधि विहिन भएपनि नेपाली उमेर समूहका टोलीले भने सफलता प्राप्त गरेका छन् । सन् २०१५ मा सातदोबाटोस्थित एन्फा टेक्निकल सेन्टरमा भएको साफ यू १९ च्याम्पियनसिपको उपाधि जितेको नेपालले २०१९ मा दशरथ रंगशालामा भएको १३ औं सागको फुटबल उपाधि जितेको थियो । नवौं सागयता पुरुष फुटबलमा यू २३ टोलीले प्रतिस्पर्धा गर्दै आएका छन् । सन् २०१५ मा महिला यू १४ च्याम्पियनसिपमा नेपाल फाइनलमा बंगलादेशसँग पराजित भएको थियो । २०७७ सालको चैतमा भएको थ्री नेसन्स कप नेपालले जितेपनि त्यो अधिकारिक अन्तर्राष्ट्रिय प्रतियोगिता भने थिएन ।